Salt

Entre as medidas para facilitar o acceso das empresas españolas aos concursos e licitacións das IFM, atópanse os fondos de consultora que España mantén nestas dende hai 20 anos e que permiten financiar doazóns aos países beneficiarios para realizar asistencias técnicas que executen empresas españolas.

Son fondos de carácter fiduciario, o que significa que cada unha das IFMD é a responsable da súa xestión e utilización, logo de acordo con autoridades españolas. A selección das empresas ou consultores/as executores dos proxectos corresponde á IFMD.

O procedemento para acceder a estes fondos iníciase na propia IFMD. É esta a que identifica as operacións, desenvolve o seu contido técnico, licita o proxecto entre as empresas e supervisa a evolución da asistencia técnica.

A intervención do Ministerio de Economía e Facenda, a través da Dirección Xeral de Financiamento Internacional e en colaboración co Instituto de Comercio Exterior (ICEX), baséase en acordar coa IFMD as áreas e países de actuación prioritarios en cada fondo, os cales se revisan anualmente. Así mesmo, os xestores da multilateral envían para a aprobación da parte española cada unha das propostas para as que desembolsa recursos, e a representación na institución correspondente en coordinación cos servizos centrais vela porque os procedementos de contratación e a execución da asistencia técnica se axusten ao recollido nos acordos para a creación dos fondos.

Todos os fondos de consultora, agás o que España mantén no BASD, están ligados á contratación de empresas españolas, se ben permiten destinar certa porcentaxe á contratación de consultora local. No entanto, o carácter ligado dos fondos á nacionalidade das empresas dos países doadores está en cuestión neste momento. Como resultado, a medio prazo as empresas españolas poderán acceder aos proxectos financiados non só polos fondos españois, senón polo total de fondos de cada institución. Obviamente, e como contrapartida, a presenza de empresas doutros países nos fondos españois será pronto unha realidade.

Ante este novo escenario, a Administración española está a definir os sectores e áreas obxectivo dos fondos dende a perspectiva da maior competitividade das empresas españolas en cada un daqueles.

Así mesmo, está a poñer en marcha instrumentos que melloren a información dispoñible sobre oportunidades do mercado das IFM e faciliten axudas en destino ou apoio financeiro á identificación de proxectos na súa fase de xestión.

Actualmente, a Subdirección Xeral de Institucións Financeiras Multilaterais mantén nove fondos de consultoría con cargo á liña FEV multilateral:

• Fondo de consultora coa Corporación Financeira Internacional (Grupo Banco Mundial).
• Fondo de consultora co Banco Interamericano de Desenvolvemento, incluído no Fondo Xeral de España.
• Fondo de consultora co Banco Asiático de Desenvolvemento.
• Fondo de consultora coa Corporación Andina de Fomento.
• Fondo de consultora no Banco Centroamericano de Integración Económica.
• Conta de Asistencia Técnica no Fondo Monetario Internacional.
• Fondo de Asistencia Técnica de FEMIP.
• Fondo Fiduciario de FEMIP.
• Fondos de consultora do BERD.

• Os servizos habitualmente solicitados son:
  
  • Estudos de identificación e preparación de proxectos.
  • Estudos de viabilidade de proxectos.
  • Estudos sectoriais e técnicos detallados.
  • Supervisión de proxectos.
  • Asistencia técnica e asesoramento.
  • Actividades de capacitación.
• Con estes fondos perséguese, entre outros obxectivos, a progresiva entrada das empresas e consultores/as españois nas IFMD, para así conseguir un efecto multiplicador na concesión de contratos a España.
• No ano 2009, o grupo de traballo do FEV multilateral aprobou 30 operacións por importe superior a 11,5 millóns de euros ós que habería que sumar outros 2,5 millóns de dólares.
• Os proxectos financiados con cargo aos Fondos de Consultora publícanse tanto na páxina web do Ministerio de Economía e Facenda coma na do Ministerio de Industria, Turismo e Comercio.

• Ministerio de Economía e Facenda (información por IFMD).
  
  No apartado de Fondos de Consultora incluído na sección de Financiamento Internacional, amosa os nove fondos existentes, coa súa normativa e os proxectos existentes na actualidade.
  
      Ir á páxina.

• Ministerio de Industria, Turismo e Comercio (información por países).
  
  Figura unha listaxe de países e os proxectos en execución en cada un deles.
      
  Para as empresas consultoras españolas interesadas en participar no mercado das licitacións internacionais resulta de sumo interese estar ao tanto dos proxectos financiados polos Fondos de Consultora. A través do servizo de alertas de SALT recibirán información no seu correo electrónico de todos os novos proxectos nos que a súa empresa pode participar.